Wedikpa Terzungwe Bernard is a citizen of Uvir in Guma local government area of Benue state, in this open letter to Governor Samuel Ortom, he expressed dismay over the anticidents that have continued to befall Tiv Nation unabated.
READ: WASHIKA WAM HEN GOMNA U KPENGTAR U BENUE, TOR TIV MAN ATOR A HEN TAR TIV CII
M sugh Orvesen wam, Orcivirigh gomna Samule Ortom, shi m ngu sughun Begha u Tiv cii, Orcivirigh Prof James Iorzua Ayatse.
Tsô ne nderem nena hen sev mbu nyian mbun? M na jighjigh mer; ne mba dedoo, yô se wuese Aôndo TER kpishi sha uvande Nav mba kpirigh iyol, yô ver nen a se ato sha kwghôron wam vea ven ne.
1. M ngu wuese ne sha zegetom u ne lu eren hen tar u Benue hemban cii je yô tar Tiv ne, tar taver hegen kpishi kpa Aôndo sue ne shi taver ne asema, ne nôngu a tar wase er u de saan ishe ga. TER Aôndo Una rumun yô A seer ne mfe i hemba nahan, sha er ne za hemen u sôrun tar wase ne yô.
2. Uter av, ishima vihim keregh kpishi, m yav tugh ga sha ci u ivande i nyen i er hen tar wase la, er nyen m ungwa kwagh ne je ishima gbam awamber. I er nena ver; kwagh a lu nahana? Ka hen tar Tiv tseegh imba ne i eren ye, nahan ka a kuma ape ne pine kwagh gaa?
3. We Orvesen gomna u Benue, yange u yôô sha ahumbe gbungur gbungur wer: aluer or fa ape Terwase Akwaza a lu yô nana ôr, shi yange u ver iyua sha ci u imbaor la. Yange or môm fatyô u ôron we ape Terwase Akwaza a lu ga, i er nena hegen wan ne a hidi iyolna er un a kera er ifer ga, ator a sha Sankera cii a ngohol un ave ahar shi ve er un msen shi ve gber ifan, ve tee u za nan we ve i hingir u un a zua a ku?
4. Umbur nen ner: Iwoo or hii hen tar u Nigeria ka nyian ga, ior mba sha tar atsonka mba iyer er: Boko-Haram la, gomenti u shin tine ka a tôô ve a za wa ve ityom, i wa ve imakeranta ken tarbuter, ior mbara mba inja vough er ka ator shin ônov mba tor nahan, kwaghyan shin akondo man mlu ve hemba ator a hen tar wase Tiv, iyange môm gomenti u shin tine ngu a er mhen u wuan Boko-Haram mba ve gem asema ga, i er nena ve i gbe keng u a wua Gana?
5. M umbur tsembelee, shighe u yange tyô i Benue cii zua sha IBB square u eren msen u za iin iorov akunduatargber kar, mba yange agbidyegbough wua la, yange Orvesen Wantaregh Paul Unôngu kaa er: aluer gomenti u shin tine fatyô u kuran se ga yô, vea sange agumaior a taver iyol vea tese ve u kuran tar wase. Er yange Orvesen Gemade ôr kwagh ne zan zan nyian mbaagbidyegbough mba wuan se heregh, nahan ka nyi er ve? Wanye u taver iyol u nana shi pine atôatyev kwagh hen tar Tiv kpa nan ngu ga, kape i eren tar ne je kpa?
6. Or u pinen kwagh sha ci u tar u Benue kera ngu ga shini imba ne?
M vaa Gideon Orkaa, J.S Tarka, Victor Malu kua mbagenev mba m fetyô u teren ati ve heen ga yô.
7. Orvesen gomna, aluer u ungwa ato sha kwagh ne u pine kwagh ga, tar u Benue u a kera lu sha mkpeiyol ga. Mbayev mba atôatyev nga cian kpa mba kôrun ngohol hen gbenda sha ikev you wuan, wan u Tiv u taver shima er Gana nahan shi hen tar Tiv kpa?
8. Orvesen gomna, u nôngu kwagh me puu ga, kpa ieren i ingi yô aluer u de wer, i saa nahanaa yô, u hingir kwase shinii hanma shie yô u zer vaan a vaa?
9. Oragbidyegbough u a lu hemen tar Nigeria ne a kôr se Tiv ihom ka i been ga, yila mkonbu u abur a bur, we man ator a hen tar Benue cii, tôv nen sha kwagh ne, gadia imbakwagh ne ka kunya.
10. Me a lam wue wue kpa ka mlu u ken shima a nem m lam wue wue nahan ye. Ishima vihim keregh gande. M na jighjigh mer: ne zua a washika ne shi ne er tom sha mi kpaa.
M sugh ne kigh kigh, ka mo wan wen Wedikpa Terzungwe Bernard, m ngu Or Uvir ken Enie u Guma.
De #Counsellor
Nasarawa Reporters 